Schrijvers om de Noord

 
 
 
 
 
 
 
 
 
 

Carl-Heinz Dirks

Un weer un weer

Dat Kind will ik neet hebben, denkt de Frau. Un mien Mann will 't eerst recht neet. Na 'n Dokter kann ik neet, dat is to laat. Man dat helpt nix. Wat se ok probeert, un se probeert vööl, 't helpt nix.
    'n Kind is upstahn, 'n lüttje Wicht! Wat is de junge Moder blied. Swegermoder kummt, dat mutt se doch sehn. Se brengt Blomen mit. Un meent so bito: 'Ik harr ja lever 'n Jung hatt. Wichter much ik noch noit lieden, - man, 't is ja nu maal geböhrt.'
    De lüttje Jung hett spöölt. He hett so düchtig spöölt, dat he de Welt um sük to vergeten hett. Un dat he vööl drunken harr, hett he ok vergeten. Nu is daar 'n natte Pleck an de Stee, waar he spöölt hett. Vader sücht dat. Grippt hum an d' Hals un drückt de Jung sien Gesicht up de Grund. In dat Natte. 'Dat will 'k di lehren!', bölkt he.
    Stadtfest. Up de Raadhuusplatz Buden, Minsken un Laway. De Straten sünd ofsperrt, dat dat keen Unglück gifft. De Ampels sünd in Gang bleven. De Footgangerlicht steiht up Rood. 'Wi mutten stahn blieven!', röppt dat Kind. De Moder ritt an de Arm van dat Kind: 'Holl dat Muul, du Dööskopp!' - Dat Kind sall wall nich na 't Gymnasium komen.
    De Lüttje sall na d' School. Och, wat is he blied! Na d' School! Good will he will alles maken, so good as he man kann. De Mester kummt un kiekt sük dat Wark an: 'Junge', seggt he, 'dien Süster, de is ja würkelk klook, de is intelligent. Man du - du büst 'n rechte Töffel.'
    Wicht was twalv Jahr. An een Mörgen harr se Blood in 't Bedd. Ook in hör Nachthemd. 'Schiet, dat nu ok noch', see Moder, 'daar hest du wat. All Maant van nu of an!'
    Dat Wicht wuss futt: Dat is nix Goods.
    Se murk dat düchtig. An de een un anner Stee van hör Liev fung dat an, sük to wölven.
    Dat wull se neet. De Jungs, de keken daar na, un se bruukden so malle Woorden.
    Un Vader keek d'r na. Se wull lever 'n Junge wesen. Beter dat.
    Daarum hett se minner eten. Un wat se eten harr, gau weer utspeeit. Blot neet dicker worden. Slank as 'n Barkenboom. Beter 'n Jung wesen.
    De Grootmoder in Serbien blarrt, um dat hör Dochter Gewalt andaan wurr van de Kroaten.
    De Grootmoder in Albanien blarrt, um dat hör Dochter Gewalt andaan wurr van de Serben.
    De Grootmoder in Düütsland blarrt, dat hör Dochter Gewalt andaan wurr van de Russen.
    De Grootmoder in Russland blarrt, de in Uganda, de in Palästina.
    Un all blarren se um hör Dochters, kieneen um hör Söhn, de dat daan hett.
    Overall in de Welt gifft dat so vööl Gewalt.
    Vaders, Moders, Kinner, Neonazis, Hooligans, Kriegsverbrekers, Islamisten, Nahbers.
    Da       arheb       bikk       ee       n    Wo    o Rde    n m e h          r

vorige
volgende