Schrijvers om de Noord

 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
 
Lukas Koops
olieverfschilderij door Trudy Kramer

Lukas Koops

Vrouw

Australië was dankzij de Olympische Speulen een paor week wereldneis en dus mus der veur het oog van de wereld even wat rechtzet worden in de beeldvörming. De geschiedenis mus oppoetst worden. Bijna elk laand hef wel een zwarte periode in de iegen historie met een diel van de oorspronkelijke bevolking as slachtoffer. Kiek maor naor de Indianen in Amerika of de Indonesiërs in Nederlaand. Dèenk ok maor ies an de jeuden in Duutslaand of de zwarten in Zuudafrika. In Australië giet het um de Aboriginals. Bij de Olympische Speulen perbeerde de Australische organisatie de systematische underdrukking van dizze Aboriginals te compenseren deur ze alle eer te bewiezen die maor meugelijk is. Ze mugden een prominente rol speulen tiedens de openingsceremonie en de Aboriginal-hardloopster Kathy Freeman weur oetroepen tot nationale heldin. De Speulen bint veurbij. De camera's bint weer vot. Ik duur te wedden dat die Aboriginals inmiddels weerumschupt bint in heur hok. Ze mugden daor even oet, maor ze moet heur stee wel weten. Het is vanzölf niet aid feest.
  Die Australiërs kunt nog wat leren van de Portugezen as het giet um het gangs wezen met de iegen achtergrond, de iegen identiteit. Oet vrees dat de nationale identiteit van Portugal verdwient deur de gevolgen van de globalisering en de Europese ienwording is de Portugese overheid vlidden week begund met het oetdielen van Portugal-pakketten an kinder. Het pakket bestiet oet de vlag, een opnaome van het volkslied en een kaort van Portugal. Alle kinder tussen zes en tien jaor kriegt dit pakket. President Sampaio en premier Guterres vindt dat de Portugezen trots moet wezen op wie ze bint en op de iegen geschiedenis. Prachtig. Niks as lof veur dizze grote geesten.
  Ze hebt ok nog bedacht dat de kedogies oetdield moet worden deur agenten in uniform, umdat dat deur kinder associeerd wordt met het gezag van de staot. Kiek, dat is nou ok al jaoren mien grote dreum. Ok de Drèentse kinder moet veul meer respect kriegen veur heur iegen achtergrond. Daorum moet autochtone Drenten in klederdracht ok zo gauw meuglijk pakketties oetdielen op Drèentse basisschoelen. Pakketties met daorin een beeldtie van Bartje, het glieknaomige boek van Anne de Vries, de tekst van het Drèentse volkslied, een gratis lidmaotschap van het Volk van Grada of 't Aol Volk en een levenslang abonnement op Oeze Volk. Dit alles is geweldig goed veur oes zölfbewustzijn en veurkomp dat der ooit een tied komp waorin wij oes laot underdrukken deur de nationale overheid.
  As de Aboriginals op vergliekbaore wieze warkt hadden an heur iegen identiteit was heur nooit overkommen wat heur nou overkommen is. Ok op de vrouw in het algemien en de Nederlaandse vrouw in het byzunder is dizze riddenering van toepassing. Dankzij een decennialange stried van de vrouwenbeweging hebt de Nederlaandse vrouwen een zölfbewustzijn ontwikkeld dat zien weerga in de wereld niet kent. Dat een Deense hoer de kosten van een börstvergrotende operatie dommiet kan oftrekken van de belasting, umdat dat een investering is die de bedriefsvoering verbetert, is mooi, maor dat is binnenkört in Nederlaand ongetwiefeld ok het geval nou de prostitutie per ien oktober legaliseerd is. Der bint nog veul belangwekkender ontwikkelings an de gang. Zo is oet underzuuk bleken dat de mieste vrouwen niet of in elk geval veul minder wilt warken. Een drastisch toenummen zölfbewustzijn hef der veur zörgd dat al die vrouwen anno 2000 gewoon hardop duurt te zeggen dat ze het liefst met de Story of Privé en een glas sherry binnen handberiek op de baank wilt liggen. Maor der is meer. Dat weur de wereld toond via het schitterende tillevisieprogramma 'Ja, ik wil ... een miljonair'. Chagrijnige criticasters braandden dit Joop van den Ende product volledig of, maor ze hebt niet in de smiezen dat ze daormet hier iegen domheid etaleert. Dit fraaie RTL-4 programma, waorin tientallen vrouwen anbeuden te willen trouwen met een miljonair die ze nog nooit zien hadden, hef een trend openbaard die binnen ofzienbaore tied ongetwiefeld ok wetenschappelijk underbouwd zal worden. Vrouwen bint definitief de schaomte veurbij. Ze vertikt het um nog langer het politiek correcte beeld in staand te holden dat der in dit laand allent maor trouwd wordt oet liefde. Ze weigert um nog langer de wereld wies te maoken dat allent langs het traject verliefd, verloofd en trouwd het ware geluk bereikt kan worden. Ze breekt rigoureus met al dat pseudo-romantische gedoe en gaot zunder umwegen rechtstreeks op heur doel of en dat is een man met een bult geld. Zoas de homo's tied neudig hadden um zuch te bevrijden en het volk heur ware aard te tonen, zo geldt dat in misschien nog wel starkere mate veur de vrouw. Onzin dus um nao het zien van dit programma daor critische kanttiekens bij te plaotsen. Het hef niks van doen met het verkwaanseln van het recht op zölfbeschikking deur vrouwen of met ziekelijke hebberigheid. 'Ja, ik wil... een miljonair' is de definitieve bevrijding van de vrouw. Ze duurt eindelijk te laoten zien hoe ze warkelijk is.

vorige
volgende